Tovuzda güclü külək onlarla sakini evsiz qoydu

Dekabrın 23-ü axşam saatlarından Tovuzda əsən külək qasırğaya çevirilib.

Evlərin dam örtükləri uçub, çardaqlar aşıb, əksər evlərin hasarları tamamilə dağılıb.

Daha çox rayonun Yuxarı Öysüzlü, Əlibəyli və Hacıalılı kəndləri ziyan görüb. Güclü külək onlarla sakini evsiz qoyub.

“Bu günə kimi bu kənddə belə fəlakət görməmişdim. Möcüzə nəticəsində sağ çıxdıq”, – deyə sakini qeyd edib.

Külək təsərrüfata da ziyan vurub. Rayonun bir çox hissəsində elektrik enerjisinin verilişində uzunmüddətli fasilələr yaranıb. Ağacları da kökündən çıxaran külək sonradan yağışla əvəzlənib. Nəticədə dağılan evlər həmçinin su altında qalıb.

Tovuz Rayon İcra Hakimiyyətinin nəzdində yaradılan fövqəladə komissiya əhaliyə dəyən ziyanı araşdırır. Rayon İcra Hakimiyyətindən bildirilib ki, araşdırmalar tamamlandıqdan sonra mövcud vəziyyətlə bağlı müvafiq qərar veriləcək.