Toydan sonra kütləvi zəhərlənmə | Qurumlar araşdırmalara başladı

İmişlidə kütləvi zəhərlənmə baş verib, 20-dən çox şəxs rayon xəstəxanasına yerləşdirilib.

Ürəkbulanma, qızdırma və ishal şikayətləri ilə xəstəxanaya müraciət edənlərin hamısı Muradxanlı kəndində keçirilən toy mərasimində iştirak edən şəxslər olub.

Xəstəxanadan bildirilib ki, zəhərlənən şəxslərin 13-ü qadın, 7-si kişi, onlardan 4-ü isə uşaqdır. Uşaqlar uşaq şöbəsində, digər xəstələr isə təcili yardım və yoluxucu xəstəliklər şöbəsində müalicə olunurlar. Xəstələrə lazımi tədbirlər göstərilib, vəziyyətləri stabildir.

Baş Prokurorluğun mətbuat xidmətindən bildirilib ki, İmişlidə 55 nəfərin qida zəhərlənməsi şübhəsi ilə xəstəxanaya müraciət etməsi faktı ilə bağlı rayon prokurorluğunda araşdırma aparılır.

Zəhərlənmənin səbəbinin müəyyənləşdirilməsi məqsədilə prokurorluq əməkdaşları tərəfindən Qida Təhlükəsizliyi Agentliyi əməkdaşlarının iştirakı ilə yaşayış evindəki qidalardan nümunələr götürülərək müvafiq ekspertizalar təyin edilib və digər zəruri prosessual hərəkətlər icra olunub.

Hazırda zərərçəkmiş şəxslərin müalicələri davam etdirilir.