Türkiyədən Azərbaycana qaçan Kamran Zülfüqarovun məhkəməsi keçirildi

Suriyada qanunsuz silahlı birləşmələrdə iştirak etməkdə ittiham olunan 41 yaşlı Kamran Zülfüqarovun məhkəməsi başa çatıb.

Kamran Zülfüqarov 2018-ci ildə məhkəmə qərarı ilə Azərbaycan vətəndaşlığından çıxarılıb. Onun Suriyadakı cinayətkar fəaliyyəti isə 2013-cü ili əhatə edib. Sonradan əməllərindən peşman olaraq gizli yolla Azərbaycana gələn Kamran Zülfüqarov Dövlət Təhlükəsizliyi Xidmətinin əməliyyatçıları tərəfindən müəyyən edilərək tutulub.

Təqsirləndirilən şəxs ifadəsində deyib ki, Suriyada təlimlərdə iştirak edib. Həmin ölkənin Haritan şəhərində “Xalid dayı” dini ləqəbli şəxsin rəhbərlik etdiyi “Xalid dayının camaatı” adlı qanunsuz silahlı qruplaşmanın üzvü olub. Amma sonradan Xalid dayı ilə arası pisləşdiyi üçün sonuncu onu İŞİD-ə həbs etdirib. 2 ay sonra həbsdən buraxılaraq gizli yollarla Türkiyəyə qaçıb. Kamran bir neçə il Türkiyədə yaşadıqdan sonra TIR-ın altında gizlənməklə qanunsuz yolla Azərbaycana keçib.

Məhkəmə heyəti dəlil və sübutları tədqiq etdikdən, şahid ifadələrini dinlədikdən sonra təqsirləndirilən şəxsin verilmiş ittihamla cəzalandırılmasını qanunauyğun hesab edib.

Qeyd edilib ki, təqsirləndirilən şəxsin əməli Suriyada da cinayət hesab olunub. Hökmə əsasən, Kamran Zülfüqarova 5 il müddətinə azadlıqdan məhrumetmə cəzası verilib.