Uşağın üstünə su töküblər, amma... | Sabirabadda ailə yanan evin içində qaldı

Sabirabadın Bala Həşimxanlı kəndində ev yanıb.

Yanğın nəticəsində xəsarət alan ata, ana və övladları xəstəxanaya çatdırılıb.

Məlumata görə, aprelin 10-u saat 04:40-da Sabirabad rayonunun Bala Həşimxanlı kəndində fərdi yaşayış evində baş vermiş yanğın nəticəsində yeddi nəfər (dörd qadın, üç kişi) Şirvan Şəhər Mərkəzi Xəstəxanasına hospitalizasiya olunub. Onların hər birinə zəruri tibbi xidmətlər göstərilib. Altı nəfər ambulator müalicə üçün evə buraxılıb.

2012-ci il təvəllüdlü şəxsə (qadın cinsli) bədənin 99 faizini əhatə edən 3-cü dərəcəli yanıq diaqnozu təyin olunub. Pasiyentə bütün zəruri reanimasiya tədbirləri göstərilib. Vəziyyəti ağır olaraq qiymətləndirilir və ixtisaslaşmış tibb müəssisəsinə təxliyəsi planlaşdırılır.

“Yanğın səhərə yaxın baş verib. Ayılıblar ki, evi alov bürüyüb. Uşaqlardan biri ciddi xəsarət alıb. Üstünə su töküblər ki, alov sönsün. Yaşamaq ehtimalının aşağı olduğu deyilir”, – xəsarətalanların qohumu Rövşən Əliyev hadisə barədə danışarkən deyib.