“Uşaq ana deyəndə biz ona nə verək?” | Ölən ananın yaxınları hər şeyi danışıb fəryad etdi

Qusarda ana ölümü qeydə alınıb.

Xuray kənd sakini Yasəmən Ospatova ikinci övladını dünyaya gətirmək üçün xəstəxanaya gətirilib. O, doğuşdan sonra həyatını itirib.

Mərhumun həyat yoldaşı Zakir Ospatov hadisənin həkim səhlənkarlığı səbəbindən baş verdiyini söyləyib.

“Əməliyyat uzun çəkdi. Səbəbini soruşanda əməliyyatın ağır keçdiyini dedilər. Sonra həyat yoldaşımı reanimasiyaya yerləşdirdilər. Səhər mənə zəng gəldi, təcili xəstəxanaya çağırdılar və yoldaşımın vəfat etdiyini dedilər. Günahı həkimdə görürəm. Birinci övladımız dünyaya gələndə də yoldaşımın başına belə hadisə gətirmişdi”, – deyə o əlavə edib.

Hadisə ilə bağlı TƏBİB-dən bildirilib ki, avqustun 11-də 38-39 həftəlik hamilə qadın Qusar Rayon Mərkəzi Xəstəxanasının Doğum şöbəsinə müraciət edib. 33 yaşlı şəxsə zəruri laborator və instrumental xidmətlər göstərilib, qeysəriyyə kəsiyi əməliyyatına zərurət yarandığı bildirilib.

Əməliyyatdan sonra pasiyentdə ağciyər arteriyasının tromboemboliyası, ağciyər, qaraciyər, böyrək və ürək çatışmazlığı, eyni zamanda tromboz (qan laxtalanması) müşahidə olunduğundan müalicəsi Reanimasiya şöbəsində davam etdirilib.

Avqustun 12-si saat 08:30 radələrində vəziyyəti pisləşən pasiyentdə ürək döyüntüləri müşahidə olunmayıb. Dərhal zəruri tibbi xidmətlər göstərilib və pasiyentin ürək fəaliyyəti bərpa edilib. Daha sonra ixtisaslı həkim-mütəxəssis baxışı həyata keçirilib və sağlamlıq vəziyyəti yenidən qiymətləndirilib.

Pasiyentin vəziyyəti gecə saatlarında təkrar pisləşib və həkimlərin çoxsaylı səylərinə baxmayaraq, saat 23:40 radələrində şəxsin ölüm faktı qeydə alınıb.

Faktla bağlı araşdırma aparılır.