“Venesiya” şadlıq sarayında dəhşətli mənzərə | Hadisənin detalları üzə çıxdı

Qida Təhlükəsizliyi Agentliyi paytaxtdakı “Venesiya” şadlıq sarayında plandankənar yoxlama keçirib.

Yoxlama zamanı obyektin mətbəxində ciddi nöqsanlar aşkar edilib. Müəssisədə dezinfeksiya işlərinin sənədləşdirilməməsi, işçilərin gigiyenik təlimlərə cəlb olunmaması, izləmə sisteminin olmaması, əl yuma şəraitinin təmin edilməməsi, havalandırma sistemlərinin işlək vəziyyətdə olmaması və istifadə edilən avadanlıqlarda korroziya və təmizliklə bağlı ciddi çatışmazlıqlar müşahidə edilib.

Həmçinin tullantıların idarə olunması, temperatur rejiminin qorunması və qida məhsullarının saxlanma şəraitində də ciddi pozuntular qeydə alınıb.

Bununla yanaşı, işçi heyətin əllərindən yaxma nümunələri götürülərək sınaq laboratoriyasına təqdim edilib. Müayinələr nəticəsində obyektdə qida məhsullarının hazırlanması və saxlanması zamanı sanitar-gigiyenik tələblərə riayət edilməməsinin və çarpaz çirklənmənin qida zəhərlənməsinə səbəb olduğu müəyyən edilib.

Aşkar edilmiş pozuntularla əlaqədar müəssisə rəhbəri barəsində inzibati xəta haqqında protokol tərtib edilib, “Venesiya” şadlıq sarayının mətbəx sahəsinin fəaliyyəti müvəqqəti məhdudlaşdırılıb.

Faktla bağlı toplanmış materiallar hüquq-mühafizə orqanının sorğusu əsasında müvafiq olaraq təqdim edilib.

Qeyd edək ki, aprelin 18-də “Venesiya” şadlıq sarayında keçirilmiş toy mərasimində 55 nəfərin kütləvi zəhərlənməsi halı qeydə alınmışdı.