Yol çökdü, dəhşətli mənzərə yarandı | Bu yoldan keçənlərin nəzərinə! - Baku TV

Muğanlı-İsmayıllı avtomobil yolunun Basqal qəsəbəsi istiqamətində sürüşmə baş verib. Nəticədə yolun təxminən 10 metrlik hissəsi çöküb.

Sözügedən avtomobil yolu rayonun 11 yaşayış məntəqəsini birləşdirir. Təxminən 4 min sakinin yaşadığı Basqal, Zeyvə, Qıçatan, Keyvəndi və Sulut kəndlərinə gediş-gəliş üçün əsas yollardan biri hesab olunur.

Məlumata görə, yol təxminən iki il əvvəl istifadəyə verilib. Hazırda sürüşmə baş verən ərazidə iri çatlar və dağıntılar yaranıb. Bu vəziyyət nəqliyyatın hərəkətini çətinləşdirir. Xüsusilə axşam saatlarında ərazidə işıqlandırmanın olmaması sürücülər üçün əlavə risk yaradır.

Qeyd edək ki, yol Azərbaycan Avtomobil Yolları Dövlət Agentliyinin 9 nömrəli Yol İstismar İdarəsi MMC-nin balansındadır. Hazırda sürüşmə baş verən ərazidə xəbərdaredici nişanlar quraşdırılmayıb. Lakin təhlükəli hissə lentlə əhatələnib.