Yüksəkvəzifəli şəxs hoteldə ölü tapılıb

Azərbaycanda yüksəkvəzifəli şəxs hoteldə ölü tapılıb. Oğuz rayonunda yerləşən hoteldə qonaq olan 1966-cı il təvəllüdlü Quliyev Sübhan Ağakişi oğlu orada vəfat edib.

Hotel əməkdaşının verdiyi məlumata görə, mərhum özünü gecə pis hiss etdiyindən Təcili Tibbi Yardıma müraciət edilib. Tibbi yardım göstərildikdən sonra S.Quliyev otağında yuxuya gedib. Bu gün səhər isə onun dünyasını dəyişdiyi məlum olub.

“Səhər saatlarında vəziyyətini öyrənmək üçün otağına getdim. Qapını açıb gördüm ki, hamamda yerdə uzanıb”, – deyə hotel əməkdaşı qeyd edib.

Təcili Tibbi Yardım şöbəsindən isə bildirilib ki, S.Quliyev yüksək qan təzyiqindən əziyyət çəkirmiş.

Qeyd edək ki, S.Quliyev əvvəllər xüsusi xidmət orqanlarında xidmət edib. O, pensiyaya çıxdıqdan sonra 2020-ci ildə Azərbaycan Dövlət Turizm Agentliyinin sədrinin müşaviri vəzifəsinə təyin edilib və hazırda həmin vəzifəni icra edirmiş.

Faktla bağlı araşdırmalar davam etdirilir.