Zabratdakı qandonduran hadisənin təfərrüatı | Keçmiş məhkuma hökm oxundu

Yatağda çapacaqla həyat yoldaşına zərbələr vuraraq onu öldürməyə cəhd edən şəxsin cinayət işi yekunlaşıb.

Belə ki, 2021-ci il sentyabrın 3-də Kəmalə Mirzəyeva ağır yaralı halda 3 saylı Şəhər Kliniki Xəstəxanasının Reanimasiya şöbəsinə çatdırılıb. Göstərilən tibbi yardım nəticəsində onun həyatı xilas edilib. Elə həmin gecə hadisəni törədən qadının əri, əvvəllər məhkum olunmuş Şükür Mirzəyev polis əməkdaşları tərəfindən saxlanılıb.

Bundan sonra Sabunçu Rayon Prokurorluğunda Cinayət Məcəlləsinin qəsdən adam öldürməyə cəhd maddəsi ilə cinayət işi başlanılıb.

İstintaqla müəyyən edilib ki, Şükür Mirzəyev narkotik vasitələr istifadə edib, ailəsində mütəmadi münaqişə yaratdığı üçün arvadı Kəmalə Mirzəyeva hərəkətlərindən bezib və onu danışdırmayıb. Sentyabrın 3-ü gecə saat 2 radələrində Zabrat qəsəbəsində yaşadığı evin mətbəxindən məişət təyinatlı çapacağı götürüb yoldaşının yatdığı otağa daxil olub. Öldürmək məqsədilə çarpayıda yatan qadının baş və bədəninin müxtəlif nahiyələrinə 8 dəfə zərbə endirib. Atası Mirzə Mirzəyev hadisəni görüb müdaxilə etdiyindən cinayət əməlini başa çatdıra bilməyib.

Kəmalə Mirzəyeva hadisə yerinə gəlmiş qonşuların və təcili tibbi yardım briqadasının köməkliyi ilə Sabunçu Tibb Mərkəzinə çatdırılıb. Bu hərəkəti ilə Şükür Mirzəyəv zərərçəkmişi qəsdən öldürməyə cəhd edib.

Zərəçəkmiş Kəmalə Mirzəyeva ifadəsində bildirib ki, ailə quran vaxtdan əri Şükür Mirzəyev işləməyib. Mütəmadi narkotik vasitələrdən istifadə edən ər ailə üzvləri ilə aqressiv davranıb, dəfələrlə arvadını döyüb. Qayınatasının təqaüdü ilə dolana bilmədiklərindən Kəmalə Mirzəyeva 2021-ci ildən dayə kimi işləməyə başlayıb.

Avqustdan sentyabra kimi Şükür narkotik vasitələrdən asılılığını tərgitmək məqsədilə Narkoloji Dispanserdə müalicə olunub. Məhkəmə-narkoloji ekspertizasının rəyinə görə, Şükür Mirzəyev narkomaniya xəstəliyi aşkar edilib. Məhkəmə iclasında o, ittiham üzrə özünü təqsirli bilib.

Bakı Ağır Cinayətlər Məhkəməsinin hökmü ilə Şükür Mirzəyev cəzasını ciddi rejimli cəzaçəkmə müəssisəsində çəkməklə 14 il müddətinə azadlıqdan məhrum olunub.