Zəng etdilər ki, yanğın başlayıb, gəl | Nərimanovdakı yanğında zərərçəkənlər hadisəni danışdı

Nərimanov rayonu, Əhməd Rəcəbli küçəsində beşmərtəbəli yataqxana tipli binada yanğın baş verib.

Hadisə ilə əlaqədar dərhal əraziyə Fövqəladə Hallar Nazirliyinin əməkdaşları cəlb olunub.

Sakinlərdən biri hadisə ilə bağlı Baku TV-yə danışıb.

“Mənə zəng edərək binada yanğın baş verdiyini dedilər. Gəlib gördüm ki, FHN-in işçiləri alovu söndürürlər. Yanğın qonşu evlərin birində başlayıb, oradan da binanın digər hissələrinə yayılıb. Bura yaşamaq üçün yararlı deyil, bizi təxliyə etsəydilər, yaxşı olardı”, – zərərçəkən Mehman Aslanov söyləyib.

Fövqəladə Hallar Nazirliyinin şöbə rəisi Əlibala Əlizadə bildirib ki, yanğın nəticəsində beşmərtəbəli, hər mərtəbəsi 860 kvadratmetr olan yataqxana tipli binanın beşinci mərtəbəsində ümumi sahəsi 22 kvadratmetr olan bir otaq və hər biri 6 kvadratmetr sahə təşkil edən 6 ədəd, ümumilikdə 36 kvadratmetr eyvan tipli ərazi yanıb:

“Hadisə nəticəsində heç bir xəsarət faktı qeydə alınmayıb. Alov tam olaraq söndürülüb. İlkin səbəblə bağlı araşdırmalar aparılır, ictimaiyyətə bununla bağlı əlavə məlumat veriləcək”.