Ağır atletika üzrə Afrika çempionatında daha bir qızıl medal

Tunisdə keçirilən ağır atletika üzrə Afrika çempionatında daha bir idmançımız parlaq çıxışı ilə diqqət çəkib.

67 kq çəki dərəcəsində qüvvəsini sınayan İsa Rüstəmov birdən qaldırmada 138 kq-ın öhdəsindən gəlib. Təkanla qaldırmada 164 kq-ı ram edən İsa ümumən iki hərəkətin cəmində 302 kq-lıq nəticəyə imza atıb. Bununla da, azərbaycanlı idmançı hər 3 növdə 1-ci yerin sahibi olub.

Qeyd edək ki, mayın 11-də start götürən Afrika çempionatında daha əvvəl təmsilçilərimizdən Nazilə İsmayılova da eyni uğura imza atıb. 45 kq çəkidə mübarizə aparan Nazilə bütün növlərdə rəqiblərini qabaqlayaraq qızıl medalın sahibi olub.