AVRO-2024 | Belçika - Slovakiya matçı

Böyük turnirlərin daimi favoritləri arasında olan Belçika millisi AVRO-2024-də ilk görüşünə çıxıb.

Baş məşqçi Domeniko Tedeskonun futbolçuları Slovakiya yığması ilə üz-üzə gəliblər.

Frankfurt şəhərində baş tutan oyunda hesab erkən açılıb. Artıq 7-ci dəqiqədə İvan Şrants slovakiyalıları irəli çıxarıb.

Buraxılan topdan sonra belçikalılar təzyiqi artırıblar. Lakin fasiləyədək onların hücumları nəticəsiz qalıb.

2-ci yarı da eyni məcrada davam edib. “Qırmızı şeytanlar”ın səylərinə baxmayaraq, rəqib müdafiədə diqqətli oynayıb.

İki epizodda isə VAR-ın müdaxiləsindən sonra belçikalıların qolları ləğv edilib. Beləliklə, sərfəli nəticəni qoruyan Slovakiya millisi AVRO-2024-ə qələbə ilə başlayıb.

Qeyd edək ki, slovakiyalılar iyunun 21-i keçiriləcək növbəti matçda Ukrayna ilə qarşılaşacaq. Belçika isə iyunun 22-si Rumıniya yığması ilə üz-üzə gələcək.