AVRO 2024-ün seçmə mərhələsində növbəti görüşlər olub

AVRO-2024-ün seçmə mərhələsinin 4-cü turu çərçivəsində Türkiyə millisi Uels yığmasını qəbul edib. Samsun şəhər stadionunda keçirilən matç Umut Nayir və Arda Gülərin qolları sayəsində meydan sahiblərinin 2-0 hesablı qələbəsi ilə yekunlaşıb. Bu nəticədən sonra xallarının sayını 9-a yüksəldən “ay-ulduzlular” D qrupuna başçılıq edir. 4 xalı olan Uels yığması isə 4-cü pillədə qərarlaşıb.

Gecənin ən bol qollu görüşü İngiltərə və Şimali Makedoniya milliləri arasında olub. “Old Trafford” arenasındakı oyunda britaniyalılar 7-0 hesablı qələbə qazanıblar. Komandanın heyətində Harri Keyn dubl, Bukayo Saka isə het-trik edib. Digər qollar Markus Reşford və Kalvin Fillipsin aktivindədir. Qalibiyyətdən sonra 12 xalı olan İngiltərə millisi C qrupunun lideridir. 3 qarşılaşmadan sonra 3 xalı olan Şimali Makedoniya kollektivi isə 4-cü pillədədir.

Seçmə mərhələdə uğurla çıxış edən Qazaxıstan yığması növbəti qələbəsini qazanıb. Şimali İrlandiya millisinin qonağı olan komanda Abat Aymbetovun qolu sayəsində 1-0 hesabı ilə qalib gəlib. Hazırda 9 xalı olan Qazaxıstan kollektivi Finlandiya ilə birlikdə H qrupunda 1-ci, 2-ci yerləri bölüşdürür. Ardıcıl 3-cü oyunda uduzan Şimali İrlandiya isə 5-ci yerdədir.