Avropa çempionatı: Azərbaycanın daha bir cüdoçusu medal qazandı

Azərbaycanın daha bir cüdoçusu Podqoritsada keçirilən Avropa çempionatında bürünc medal qazanıb.

Yarımfinalda məğlub olan Rəşid Məmmədəliyev üçüncü yer uğrunda görüşdə Macarıstan təmsilçisi Daniel Zeqedini üstələyib.

73 kiloqramda mübarizə aparan R.Məmmədəliyev bürüncə gedən yolda Böyük Britaniyadan Benjamin Levi və Portuqaliyadan Otari Kvanidzeni üstələyib. Təmsilçimizin yarımfinalda çətinlik çəkdiyi rəqibi isə fransalı Qaba Juan-Benjamin olub.

Bu, azərbaycanlı cüdoçuların turnirdə qazandığı ikinci mükafat olub. Belə ki, daha əvvəl 60 kiloqramda mübarizə aparan Əhməd Yusifov üçüncü yer uğrunda görüşdə ispaniyalı Fransisko Qarriqosa ipponla qalib gələrək fəxri kürsüyə qalxıb.

Qeyd edək ki, Avropa çempionatında ölkəmizi 12 çəki dərəcəsində 9-u kişi, 6-sı qadın olmaqla ümumilikdə 15 cüdoçu təmsil edir. Yığmamız həmçinin aprelin 27-də qarışıq komanda yarışında mübarizə aparacaq.