Avropa çempionatında yüksək nəticələr əldə edən güləşçilərlə görüş keçirilib

Mərdəkan qəsəbəsində yerləşən Süleyman Rüstəm adına Xarici Dillər Təmayüllü Gimnaziyada Rumıniyada keçirilən Avropa çempionatında uğur qazanan güləşçilər və məşqçilər, eləcə də gimnaziyada təhsil alan şagird-güləşçilərlə görüş baş tutub.

Tədbirdə Güləş Federasiyasının prezidenti, iqtisadiyyat naziri Mikayıl Cabbarov, gənclər və idman naziri Fərid Qayıbov, eyni zamanda elm və təhsil naziri Emin Əmrullayev iştirak ediblər.

Çıxış edənlər dövlət tərəfindən ölkəmizdə idmanın inkişafına verilən önəm barədə danışaraq bunun təmsilçilərimizin beynəlxalq arenalarda uğurlar əldə etməsinə kömək etdiyini vurğulayıblar. Diqqətə çatdırılıb ki, qələbələr ənənəsini davam etdirən güləşçilərimiz bu il qitə birinciliyində 5-i qızıl, 3-ü gümüş və 8-i bürünc olmaqla ümumilikdə 16 medala yiyələniblər.

Qeyd olunub ki, yunan-Roma güləşi və sərbəst güləş üzrə millilərimiz Rumıniyadakı yarışda komanda hesabında ilk üçlükdə yer alıblar. Qadın güləşçilərimiz isə son 8 ilin ən yaxşı nəticəsinə imza atıblar.

Daha sonra tədbir iştirakçıları 1960-cı ildən fəaliyyət göstərən gimnaziyada yaradılan şəraitlə tanış olublar. Elm və Təhsil Nazirliyi və Azərbaycan Güləş Federasiyasının dəstəyi ilə ölkənin müxtəlif bölgələrindən 50-yə yaxın yeniyetmə güləşçinin təhsil aldığı gimnaziyada məktəblilər qida və yataqxana ilə təmin edilirlər.

Onlar burada tədrislə yanaşı, bütün zəruri avadanlıqlarla təchiz olunan idman zalında sərbəst və yunan-Roma güləşi üzrə təlim-məşq prosesinə qatılırlar. Bu layihə ilə Azərbaycanda güləşin inkişafına, yeni sağlam nəslin formalaşmasına əhəmiyyətli təkan verilməsi planlaşdırılır.