Avropa Liqasında finala yüksələn klublar məlumdur

UEFA Avropa liqasında finalçıların adlarına aydınlıq gəlib.

İtaliyada 0-2 hesabı ilə uduzduğu görüşün revanşında “Roma” komandası “Bayer”in qonağı olub.

“BayArena”dakı matçın ilk hissəsi Leandro Paredesin penalti qolu sayəsində “canavarlar”ın xeyrinə yekunlaşıb. 66-cı dəqiqədə “calorossi”nin üstünlüyü iki topa çatıb. Paredes 2-ci dəfə 11 metrlik cərimə zərbəsindən fərqlənib.

0-2 hesabı ilə geridə olmalarına baxmayaraq, ruhdan düşməyən leverkuzenlilər məğlubiyyətdən xilas ola biliblər. Əvvəlcə Canluka Mançininin avtoqolundan sonra toplardan birinin əvəzini çıxan meydan sahibləri əsas vaxta artırılan 7-ci dəqiqədə bərabərlik qolunu vurublar. Yosip Stanişiçin dəqiq zərbəsi yekun nəticəni müəyyənləşdirib. “Bayer” – “Roma”: 2-2.

Beləliklə, yarımfinaldakı mübarizənin yekununda 4-2 hesabı ilə güclü olan Almaniya çempionu yarışın finalına adlayıb. Bundan başqa, bütün turnirlərdə 49 qarşılaşmadır uduzmayan leverkuzenlilər “Benfika”ya aid olan və 59 il əvvəl qeydə alınan məğlubiyyətsizlik rekordunu yeniləyiblər.

“Bayer”in həlledici görüşdəki rəqibi “Atalanta” olacaq. “Marsel”i qəbul edən İtaliya klubu 3 cavabsız topla qalib gəlib.

Berqamo təmsilçisinin heyətində Ademola Lukman, Matteo Rudjeri və El-Bilal Ture fərqləniblər. Fransada keçirilən ilk qarşılaşma 1-1 hesabı ilə bitdiyindən iki oyunun yekununda qələbə qazanan baş məşqçi Can Pyero Qasperinin futbolçuları finala yüksəliblər.

Qeyd edək ki, Avropa liqasında mükafatın sahibini müəyyənləşdirəcək matç mayın 22-si keçiriləcək. Həlledici görüşə İrlandiyanın paytaxtı Dublindəki “Aviva Stedium” ev sahibliyi edəcək.