Avropa Liqasında ilk turun oyunlarına yekun vurulub

UEFA Avropa liqasında ilk turun maraqlı oyunlarından biri “Ayaks” və “Marsel” arasında olub.

“Amsterdam Arena”da keçirilən görüşdə 6 qol vurulub. İlk hissənin əvvəlində “Ayaks” Forbs və Bergisin topları ilə 2-0 hesablı üstünlük əldə etsə də, qonaqlar fasiləyədək Klauss və Obameyanqın qolları ilə tarazlığı bərpa ediblər: 2-2.

52-ci dəqiqədə Teylor amsterdamlıları yenidən irəli çıxarıb. Ancaq Fransa təmsilçisi məğlubiyyətdən qurtula bilib. Dubl edən Obameyanq həm də yekun nəticəni müəyyənləşdirib. “Ayaks” – “Marsel”: 3-3.

E qrupu çərçivəsində Avstriyaya səfər edən “Liverpul” yerli LASK-la görüşdə 14-cü dəqiqədə hesabda geriyə düşsə də, yekunda əzmkar qələbə qazanıb. 2-ci yarıda təzyiqi artıran “qırmızılar” Nunyez, Dias və Salahın qolları ilə 3-1 hesabı ilə qalib gəlib.

İngiltərənin digər təmsilçisi “Brayton” isə öz meydanında məğlub olub. Yunanıstanın AEK klubunu qəbul edən “qağayılar” qonaqlardan Sidibe, Qaçinoviç və Ponsenin qollarına Joao Pedronun dublu ilə cavab veriblər. “Brayton” – AEK: 2-3.

Qeyd edək ki, Avropa liqasında 2-ci turun oyunları oktyabrın 5-i keçiriləcək.