Avropanın nəhəng klubları Xviça Kvaratsxeliya uğrunda mübarizədə

“Napoli”nin gürcüstanlı futbolçusu Xviça Kvaratsxeliya tezliklə klubunu dəyişə bilər.

“Liverpul” və “Pari Sen-Jermen” 23 yaşlı vingeri artıq bu qış heyətə qatmağı planlaşdırır.

İddia olunur ki, Xviçanın transferlə bağlı mövqeyi keçidin sürətlənməsinə təsir edə bilər. Bununla belə, Neapol komandası Kvaratsxeliyanın gedişinə yalnız böyük məbləğ qarşılığında razılıq verəcək.

Belə ki, müqaviləsi 2027-ci ilə qədər olan gürcüstanlı ulduzu “transfermarkt” portalı 85 milyon avro məbləğində dəyərləndirir.

Qeyd edək ki, Xviça Kvaratsxeliya 2022-ci ildən “Napoli”də çıxış edir. 13 milyon avroya “Dinamo Batumi”dən cəlb olunan oyunçu 107 görüşə qatılıb. 30 qol və 29 assistlə yadda qalan Xviça 2023-cü ildə A Seriyasının qalibi olub. Eyni zamanda o, həmin mövsüm çempionatın ən yaxşı futbolçusu seçilib. Ötən yay Gürcüstan millisi ilə AVRO-2024-ə qatılan Kvaratsxeliya yığmada 40 matçda 17 qolun müəllifidir.