Azərbaycan kuboku - “Neftçi” komandası “Sumqayıt”la qarşılaşıb

Futbol üzrə Azərbaycan kubokunda 1/4 final mərhələsinin ilk oyunlarına yekun vurulub.

Son qarşılaşmada “Neftçi” komandası “Sumqayıt” kollektivinin qonağı olub.

Matçın startından inamlı təsir bağışlayan “ağ-qaralar” 1-ci hissədə 3 qol vurublar. 29-cu dəqiqədə Yeqor Boqomolski hesabı açıb. Fasilə ərəfəsində isə Emin Mahmudov 2 dəfə rəqibin qapısına yol tapıb.

“Neftçi”nin kapitanı əvvəlcə 44-cü dəqiqədə 11 metrlik cərimə zərbəsini dəqiq yerinə yetirib. İlk yarıya artırılan dəqiqələrdə isə Emin 3-cü topu “Sumqayıt”ın qapısından keçirib.

2-ci hissədə meydan sahibləri hücumlarını sürətləndiriblər. Nəticədə 1 saatın tamamında Elvin Bədəlov toplardan birinin əvəzini çıxıb.

89-cu dəqiqədə isə Kasimir Ninqa fərqi minimuma endirib. Ancaq “Sumqayıt” futbolçuları bundan artığını bacarmayıblar. Görüş “Neftçi”nin 3-2 hesablı qalibiyyəti ilə yekunlaşıb.

Qeyd edək ki, bu kollektivlər arasında cavab qarşılaşması fevralın 9-u “ağ-qaralar”ın meydanında keçiriləcək.