Azərbaycan Kuboku: "Qarabağ" - "Neftçi" matçı

Azərbaycan kubokunda yarımfinal mərhələsinin matçında “Neftçi” komandası “Qarabağ”ın qonağı olub.

Tofiq Bəhramov adına Respublika Stadionunda keçirilən görüşdə hesabı 16-cı dəqiqədə meydan sahibləri açıblar. Juninyo “köhlən atlar”a üstünlük qazandırıb.

İlk hissədə başqa qol olmayıb. 62-ci dəqiqədə fərq 2-yə yüksəlib. “Ağ-qaralar”ın üzvü Qara Qarayev avtoqol müəllifi olub. 2 dəqiqə sonra Reziuan Mirzov toplardan birinin əvəzini çıxıb: 1-2.

70-ci dəqiqədə Juninyo özünün 2-ci, komandasının 3-cü qolunu vurub. Qarşılaşmada son nöqtəni isə Nəriman Axundzadə qoyub. “Qarabağ” – “Neftçi”: 4-1.

Tərəflər arasında ilk oyunda Ağdam təmsilçisi 4-0 hesabı ilə qalib gəldiyi üçün “Qarabağ” iki matçın yekununda finala yüksəlib.

Baş məşqçi Qurban Qurbanovun kollektivi həlledici görüşdə “Zirə” klubu ilə üz-üzə gələcək.