Azərbaycan millisinin yeni baş məşqçisi açıqlandı

Futbol üzrə Azərbaycan millisinin yeni baş məşqçisinin adına aydınlıq gəlib.

AFFA-dan verilən məlumata görə, 3 iyun 2024-cü ildə keçirilən İcraiyyə Komitəsinin toplantısındakı müzakirənin davamı olaraq yığmamızın baş məşqçisi postuna dünyaca məşhur mütəxəssis Fernandu Santuşun namizədliyi irəli sürülüb.

Bildirilir ki, Santuşun zəngin təcrübəsi, peşəkar fəaliyyəti dövründə qazandığı uğurlar nəzərə alınaraq onun millimizin çalışdırıcısı təyin olunması barədə qərar qəbul edilib. Portuqaliyalı mütəxəssisin qarşısında rəqabətədavamlı komandanın formalaşdırılması və AVRO-2028-in seçmə mərhələsində uğurlu çıxış məqsədi qoyulub.

Qeyd edək ki, Fernandu Santuş məşqçilik karyerası ərzində ölkəsinin “Portu”, “Sportinq” və “Benfika” kimi məşhur klublarını, habelə Yunanıstanın bir sıra komandalarını, eləcə də Türkiyənin “Beşiktaş” kollektivini çalışdırıb. Müxtəlif vaxtlarda Polşa və Yunanıstan yığmalarında işləyən 69 yaşlı məşqçi əsas uğurlarını 2016-2022-ci illərdə rəhbərlik etdiyi Portuqaliya seçməsi ilə əldə edib. Pireneylilərlə AVRO-2016-nın qalibi olan Santuş 2019-ci ildə isə Millətlər liqasında qələbə qazanıb.