“Bakı Marafonu 2024” başa çatdı | Qaliblər müəyyənləşdi

Sağlam həyat tərzini təbliğ etmək məqsədilə 2016-cı ildən etibarən ənənəvi olaraq təşkil olunan “Bakı Marafonu”nda bu ilin qalibləri müəyyənləşib.

Heydər Əliyev Fondunun təşəbbüsü ilə "Küləyə qalib gəl" şüarı altında artıq 7-ci dəfədir keçirilən yarışda Baku TV-nin əməkdaşları da iştirak ediblər.

Ümumilikdə isə marafonda Azərbaycan vətəndaşları ilə yanaşı, Türkiyə, İran, Gürcüstan, Ukrayna və Rusiya, eləcə də digər ölkələrdən 18 000-dək həvəskar mübarizə aparıb.

Start və finiş nöqtələri Dövlət Bayraq Meydanında olan yarışda kişilər arasında 1-ci yeri türkiyəli Ahmet Alkanoğlu tutub. Ukraynalı Boqdan Semenoviç ikinci, uqandalı İsmail Ssenyange isə 3-cü olub.

Qadınların mübarizəsində ötən ilin qalibi, ukraynalı Natalya Simonoviç bu dəfə də finişə 1-ci çatıb. Azərbaycanlı Anna Yusupova 2-ci, qazaxıstanlı Nelli Qaitova isə 3-cü yeri tutub.

Qeyd edək ki, “Bakı Marafonu 2024”də 1-ci yerin sahibi 3 000, 2-ci və 3-cü pillələri tutanlar isə müvafiq olaraq 2 000 və 1 000 manat pul mükafatı qazanıblar.