Bakıda Olimpiya Təsnifat turnirinin açılış mərasimi baş tutub

Bakıda keçirilən güləş üzrə Avropa Olimpiya Təsnifat turnirinin rəsmi açılış mərasimi baş tutub.

Milli Gimnastika Arenasında təşkil olunan tədbirdə əvvəlcə rəqqasların çıxışı olub. Daha sonra yarışa qatılan ölkələrin bayraqları arenaya gətirilib. Ardınca Azərbaycan Respublikasının Dövlət Himni səsləndirilib.

Açılış mərasimində çıxış edən Azərbaycan Güləş Federasiyasının vitse-prezidenti Namiq Əliyev yarış iştirakçılarını salamlayaraq onlara uğurlar arzulayıb. Dünya Güləş Birliyinin vitse-prezidenti Teodoros Hamakos isə turnirə ev sahibliyi etdiyi üçün ölkəmizə təşəkkür edib. O, Olimpiya Təsnifat turnirinin yüksək səviyyədə təşkil olunduğunu diqqətə çatdırıb.

Rəsmi hissə başa çatdıqdan sonra yunan-Roma güləşi üzrə yarımfinal görüşlərinə start verilib.

Qeyd edək ki, aprelin 7-dək davam edəcək yarışda 33 ölkədən ümumilikdə 297 idmançı mübarizə aparır. Qaydalara əsasən, turnirdə final görüşləri olmayacaq. Belə ki, hər çəki dərəcəsində yarımfinalda qalib gələn güləşçilər Paris-2024-də çıxış hüququ qazanacaqlar.