Bu klub “Qalatasaray”ın ulduzuna 35 milyon avro ödəməyə hazırdır

“Qalatasaray” və Türkiyə millisinin heyətindəki uğurlu çıxışı ilə diqqət çəkən Barış Alper Yılmaza Avropa nəhənglərindən təkliflər gəlməyə davam edir.

Türkiyə mətbuatında yayılan məlumata görə, 24 yaşlı forvard İngiltərənin məşhur klubu “Vest Hem”in əsas transfer hədəfidir.

İddia olunur ki, “çəkicdöyənlər” təcrübəli futbolçu üçün “sarı-qırmızılar”a 35 milyon avro ödəməyə hazırdır. Bildirilib ki, Barış da karyerasını “dumanlı albion”da davam etdirməyə müsbət yanaşır.

Maraq üçün deyək ki, Barış Alper Yılmazla “Vest Hem”lə yanaşı, İngiltərənin “Mançester Yunayted”, “Tottenhem” və “Brayton” klubları, eləcə də Rusiyanın “Zenit” kollektivi yaxından maraqlanır.

Qeyd edək ki, Barış Alper Yılmaz 2021-ci ildən “Qalatasaray”ın formasını geyinir. 108 matçda 11 qol və 14 məhsuldar ötürmə müəllifi olan oyunçu “cim-bom”la 2 dəfə ölkə çempionu olub. “Transfermarkt” portalına əsasən isə onun dəyəri 17 milyon avrodur.