Bundesliqada çempionun adına sonuncu turda aydınlıq gələcək

Almaniya çempionatında növbəti dəfə lider dəyişikliyi olub.

“Borussiya Dortmund” 33-cü turda “Bavariya”nın “Leypsiq”ə məğlubiyyətindən məharətlə istifadə edib. “Auqsburq”un qonağı olan “sarı-qaralar” 3 cavabsız qolla qalib gəliblər. Dortmundlulardan Sebastyan Aller dubl edib. Daha bir top Yulian Brandtın aktivindədir. Bu qələbədən sonra 70 xalı olan “Borussiya” “rekordmayster”i 2 xal qabaqlayaraq ilk pilləyə yüksəlib.

Qeyd edək ki, Bundesliqada çempionun adına sonuncu 34-cü turda aydınlıq gələcək. Həlledici turda Dortmund klubu “Maynts”ı qəbul edəcək. “Bavariya” isə səfərdə “Köln”lə üz-üzə gələcək.

Premyer liqada 37-ci turun mərkəzi görüşü “Etihad Stedium”da keçirilib. Vaxtından əvvəl çempionluğunu rəsmiləşdirən “Mançester Siti” komandası “Çelsi”ni qəbul edib. Oyunun taleyini Xulian Alvaresin 12-ci dəqiqədə vurduğu yeganə qol həll edib. Qələbə sayəsində “şəhərlilər” xallarının sayını 88-ə çatdırıblar. 12-ci yerdə olan “Çelsi”nin isə 43 xalı var.