"Bayer Leverkuzen" Bundesliqada növbəti qələbəyə sevinib

Bundesliqanın lideri “Bayer Leverkuzen” növbəti qələbəsini qazanıb.

Baş məşqçi Xabi Alonsonun kollektivi 9-cu turda “Frayburq”u qəbul edib. “BayArena”da baş tutan matçda ilk hissə Floryan Virtsin qolu sayəsində 1-0 hesabı ilə yekunlaşıb. 1 saatın tamamında Yonas Hoffman meydan sahiblərinin üstünlüyünü 2 topa çatdırıb. Qonaqların gücü ancaq təsəlli qoluna çatıb. 70-ci dəqiqədə Manuel Quldenin zərbəsi dəqiq olub.

Çempionatın son 5 oyununda qələbə qazanan “Borussiya Dortmund” 9-cu turda Frankfurt səfərinə yollanıb. Qarşılaşmaya yaxşı başlayan “Ayntraxt” 24-cü dəqiqəyədək 2 qol vurub. Omar Marmuş dublunu rəsmiləşdirib.

İlk yarının sonunadək Dortmund klubu 1 topun əvəzini çıxıb. Marsel Zabitser fərqlənib. 54-cü dəqiqədə Yussufa Mukoko hesabı bərabərləşdirib. 2-2.

Bundan sonra tərəflər hərəyə daha 1 qol vurublar. Frankfurt komandasından Fares Şaibi, qonaqlardan isə Yulian Brandt hədəfi dəqiq nişan alıb. “Ayntraxt Frankfurt” – “Borussiya Dortmund”: 3-3.

21 xalı olan “Borussiya” “Ştutqart”la 3-cü, 4-cü yerləri bölüşdürür. 2 xal çox toplayan “Bavariya” 2-ci pillədədir. Lider isə 25 xalı olan “Bayer Leverkuzen”dir.