Çempionlar Liqasında 1/4 finalın daha 2 oyunu baş tutub

UEFA Çempionlar Liqasında 1/4 final mərhələsinin daha iki oyunu keçirilib.

Gecənin ən maraqlı görüşü Fransada baş tutub. PSJ doğma meydanında “Barselona” ilə üz-üzə gəlib.

Qarşılaşmada hesabı qonaq komanda açıb. 37-ci dəqiqədə Rafinya fərqlənib. “Blauqrana” fasiləyə minimal üstünlüklə yollanıb. İkinci yarıda təzyiqi artıran “Pari Sen-Jermen” 48-ci dəqiqədə hesabı bərabərləşdirib. Dembele hədəfi dəqiq nişan alıb. 51-ci dəqiqədə Ferreyra 2-ci topu “Barsa”nın qapısından keçirib. Lakin 62-ci dəqiqədə tarazlıq bərpa olunub. Rafinya dublunu rəsmiləşdirib: 2-2. Oyunda son nöqtəni Andreas Kristensen qoyub. PSJ – “Barselona”: 2-3.

Gecənin digər matçında “Borussiya” Dortmund “Atletiko Madrid”in qonağı olub. “Metropolitano” stadionunda keçirilən qarşılaşmada azarkeşlər 3 qol görüblər. Matçda hesabı 4-cü dəqiqədə meydan sahibləri açıb. Rodriqo de Paul hədəfi dəqiq nişan alıb. 32-ci dəqiqədə fərq 2-yə çatıb. Samuel Lino “sarı-qaralar”ın azarkeşlərini məyus edib. İspaniya təmsilçisi fasiləyə 2-0 hesablı üstünlüklə yollanıb. İkinci yarıda “Borussiya” Sebastian Allenin qolu ilə toplardan birinin əvəzini çıxsa da, bu sadəcə təsəlli olub.

Qeyd edək ki, bu komandalar arasında 1/4 final mərhələsinin cavab qarşılaşması aprelin 16-da keçiriləcək.