Çempionlar liqasında 1/8 finalın cavab matçları başlayır

05 mart 2024 329 baxış

Bu gün UEFA Çempionlar liqasında 1/4 finalın ilk iştirakçıları müəyyənləşəcək.

Gecənin oyunlarından biri Münhendə “Bavariya” və “Latsio” arasında olacaq.

İlk qarşılaşmada 1-0 hesablı qələbə qazanan İtaliya təmsilçisi Almaniyaya üstün kimi yollansa da, matçın favoriti yenə də “rekordmayster”dir. Bununla belə, hər iki komanda oyun ərəfəsində yaxşı formada deyil. Belə ki, “Bavariya” bütün yarışlarda son 5 görüşün cəmi 1-də qalib gəlib. Mauritsio Sarrinin futbolçuları isə son 6 qarşılaşmanın 3-də qələbə qazanıb, 3-də isə məğlub olublar.

Növbəti mərhələnin digər iştirakçısı İspaniyada “Real Sosyedad” və PSJ arasında mübarizədə müəyyənləşəcək. Bu komandalar arasında ilk oyun parislilərin 2-0 hesablı üstünlüyü ilə yekunlaşdığı üçün Fransa klubunun 1/4 final imkanları daha yüksək qiymətləndirilir.

Qeyd edək ki, həm “Bavariya” – “Latsio”, həm də “Real Sosyedad” – “Pari Sen-Jermen” matçı Bakı vaxtı ilə saat 23:55-də start götürəcək.

#Bavariya FK