Çempionlar liqasında 2-ci turun görüşləri başa çatıb

UEFA Çempionlar liqasının Liqa mərhələsində 2-ci tura yekun vurulub.

Gözlənilməz nəticələrdən biri Fransada qeydə alınıb. “Lill” klubunun qonağı olan “Real Madrid” 0-1 hesabı ilə uduzub. Yarışın son qalibinin qapısına yeganə qolu ilk hissənin sonlarında Conatan Deyvid vurub.

“Aston Villa” – “Bavariya” qarşılaşması da eyni hesabla bitib. Birmingemdə baş tutan matçda meydan sahibləri Con Duranın qolu sayəsində turu qalib tamamlayıblar.

Portuqaliyada “Benfika” və “Atletiko” arasında oyun da gözlənilməz nəticə ilə əlamətdar olub. “Estadio da Luj” arenasında baş tutan görüşdə Lissabon klubu rəqibin qapısından 4 cavabsız top keçirib. “Benfika”nın qollarını türkiyəli futbolçular – Kərəm Aktürkoğlu və Orkun Kökçü, eləcə də Anxel Di Mariya və Aleksandr Ba vurublar.

Maraqlı matçlardan birində “Leypsiq” və “Yuventus” komandaları üz-üzə gəlib. 5 qolun qeydə alındığı görüşdə qələbəni “Qoca Sinyora” bayram edib. Qapıçı Di Qreqorionun qırmızı vərəqə almasından sonra azlıqda qalan “Yuve” 3-2 hesabı ilə güclü olub.

Turnirin daha bir favoriti “Liverpul” da azarkeşlərini sevindirib. “Bolonya”nı qəbul edən “qırmızılar” 3 xalı Aleksis Makalister və Məhəmməd Salahın qolları sayəsində əldə edib.

Çempionlar liqasının pley-off mərhələsində Qarabağdan güclü olan Zaqreb “Dinamo”su “Monako” ilə matçda son dəqiqələrdə qələbəni əldən verib. Oyunun gedişində 0-2 hesabı ilə geridə olan knyazlıq təmsilçisi 2 qol vuraraq Zaqrebdən 1 xalla ayrılıb.

Azərbaycanlı hakim Əliyar Ağayevin idarə etdiyi Avstriyanın “Şturm Qrats” və Belçikanın “Brügge” klubları arasında qarşılaşma isə minimal hesabla bitib. Görüşdə yeganə qolu “Brügge”nin hücumçusu Xristos Tsolis vurub.

Qeyd edək ki, 2 turdan sonra Liqa mərhələsinin yarış cədvəlinə “Borussiya Dortmund” başçılıq edir. 2-ci yerdə “Brest”, 3-cü pillədə isə “Benfika” qərarlaşıb. Növbəti turun matçları oktyabrın 22-si və 23-ü təşkil olunacaq.