Çempionlar Liqasında 5-ci turun oyunları keçirilir

UEFA Çempionlar liqasında 5-ci turun görüşləri keçirilir.

Gecənin mərkəzi matçında “Bavariya” komandası “Pari Sen-Jermen”i qəbul edib. Münhendəki “Alyans Arena”da təşkil olunan matç meydan sahiblərinin 1-0 hesablı qələbəsi ilə yekunlaşıb. Yeganə qolu “rekordmayster”in koreyalı müdafiəçisi Kim Min-Je vurub.

Son vaxtlar işləri yaxşı getməyən və bütün yarışlarda 5 oyundur uduzan “Mançester Siti” növbəti dəfə azarkeşlərini məyus edib. Niderlandın “Feyenoord” klubu ilə üz-üzə gələn “şəhərlilər” Holandın dublu və Gündoğanın qolu ilə 75-ci dəqiqəyədək 3-0 hesabı ilə irəlidə olsalar da, üstünlüyü qoruya bilməyiblər. Ardıcıl 3 dəfə fərqlənən rotterdamlılar məğlubiyyətdən xilas olublar.

Qeyri-sabit çıxış edən daha bir kollektiv “Bayer Leverkuzen” 5-ci turda “Zaltsburq”u darmadağın edib. “Bay Arena”da təşkil olunan və Floryan Virtsin dubl etdiyi matç yerli komandanın 5-0 hesablı qələbəsi ilə bitib.

“Barselona” da turu 3 xalla başa vurub. Fransa təmsilçisi “Brest”i qəbul edən “blauqrana” 3 cavabsız topla qalib gəlib. İspaniya klubunun qələbəsində 2 qol vuran Robert Levandovski əsas pay sahibi olub.

Portuqaliyada Lissabon “Sportinq”i ilə qarşılaşan “Arsenal” rəqibinə rəhm etməyib. “Joze Alvelade” stadionunda keçirilən görüş “topçular”ın 5-1 hesablı qələbəsi ilə əlamətdar olub.

Komandanın qollarını Qabriel Martinelli, Kay Haverts, Qabriel, Bukayo Saka və Leandro Trossard vurublar.

İtaliyanın “Atalanta” və İsveçrənin “Yanq Boyz” klubları arasında baş tutan qarşılaşma daha böyük hesabla yekunlaşıb. 7 qolun qeydə alındığı oyunda Berqamo təmsilçisi 6-1 hesabı ilə güclü olub.

“Cuzeppe Meatsa” arenasında “Leypsiq”lə üz-üzə gələn İtaliya çempionu “İnter” isə qələbəni 1 qolla qazanıb. Kastello Lükebanın avtoqolundan sonra qapısını toxunulmaz saxlayan “neradzurri” 3 xalı aktivinə yazdırıb.