Çempionlar Liqasında yarımfinalın ilk iştirakçıları müəyyənləşir

Bu gün UEFA Çempionlar liqasında yarımfinalın ilk iştirakçıları müəyyənləşəcək.

Parisdə keçirilən görüşdə PSJ-ni 3-2 hesabı ilə məğlub edən “Barselona” bu dəfə rəqibini öz meydanında qəbul edəcək. İspaniyadakı matçda Alehandro Balde və Qavi zədə, Andreas Kristensen və Serji Roberto isə vərəqə cəzalısı olduqları üçün “blauqrana”ya kömək edə bilməyəcəklər.

“Pari Sen-Jermen”də isə Presnel Kimpembe, Leven Kürzava və Serxio Riko zədəlidirlər.

Qeyd edək ki, Barselona şəhərindəki Olimpiya stadionunda keçiriləcək oyun Bakı vaxtı ilə saat 23:00-da başlayacaq. Yarımfinala yüksələn daha bir komandanı “Borussiya” və “Atletiko” müəyyənləşdirəcəklər.

Madriddəki qarşılaşmada 2-1 hesablı qələbə qazanan “Atletiko” cavab matçından əvvəl müəyyən üstünlüyə malikdir. Lakin İspaniya təmsilçisi bu görüşdə zədəli olan Memfis Depay, Toma Lemar və Vitolo, eləcə də cəzalı Samuel Linonun köməyindən istifadə edə bilməyəcək.

Bundesliqanın son turunda Mönhenqladbax “Borussiya”sına qalib gələn dortmundlularda isə Rami Bensebaini və Sebastyan Aller zədəlidir. “Siqnal İduna Park” arenasında keçiriləcək bu oyun da Bakı vaxtı ilə saat 23:00-da başlayacaq.