Çempionlar Liqasının Liqa mərhələsində mübarizə yekunlaşdı

UEFA Çempionlar liqasının Liqa mərhələsində son turun matçları keçirilib.

Bu oyunların yekununa əsasən, 1/8 finala adlayan daha 6 komanda məlum olub.

Daha əvvəl bu mərhələyə yüksələn “Liverpul” və “Barselona” ilə yanaşı, “Arsenal”, “İnter”, “Atletiko Madrid”, “Bayer Leverkuzen”, “Lill” və “Aston Villa” klubları da növbəti raunda vəsiqə qazanıblar.

1/8 finalın digər iştirakçıları isə Liqa mərhələsində 9-24-cü yerləri tutan komandalar arasında görüşlərdən sonra müəyyənləşəcək. Bu klublar “Atalanta”, “Borussiya Dortmund”, “Real Madrid”, “Bavariya”, “Milan”, PSV, PSJ, “Benfika”, “Monako”, “Brest”, “Feyenoord”, “Yuventus”, “Seltik”, “Mançester Siti”, “Sportinq” və “Brügge”dir.

Yanvarın 31-i keçiriləcək püşkatmadan sonra əlavə pley-off raundunun cütləri açıqlanacaq. Bu mübarizədə qalib gələn komandalar isə artıq 1/8 finalda olan klublara rəqib olacaqlar.

Qeyd edək ki, 1/8 finala yüksələn son kollektivləri müəyyənləşdirəcək ilk matçlar fevralın 11-i və 12-də, cavab oyunları isə fevralın 18-i və 19-da təşkil olunacaq.