Eduard Məmmədovun tələbələri dünya kubokunda 2 qızıl medal qazanıblar

Azərbaycan Kikboksinq Federasiyasının vitse-prezidenti, əməkdar məşqçi, dəfələrlə dünya və Avropa çempionu Eduard Məmmədov və onun köməkçisi, əməkdar məşqçi Ayaz Mehdiyevin tələbələri daha bir yarışda parlaq çıxış ediblər.

Kikboksçular mayın 14-dən 19-dək Türkiyədə keçirilən WAKO Dünya Kubokunda 2 qızıl medal qazanıblar. Eduard Məmmədovun tələbələrindən Tamerlan Məmmədli 75 kq çəkidə “Low-kick” növündə, 52 kq-da yer alan Əli Tağıyev isə “kick-light”da 1-ci yeri tutub.

Ümumilikdə kikboksinq üzrə klublardan ibarət yığmamız Antalya şəhərindəki turnirdə 17-si qızıl, 16-sı gümüş və 16-sı bürünc olmaqla 49 medala yiyələnərək komanda hesabında 3-cü olub.

Eduard Məmmədov bu uğur münasibətilə Kikboksinq Federasiyasının fəxri prezidenti, Suraxanı rayon İcra Hakimiyyətinin başçısı Adil Əliyevə və Kikboksinq Federasiyasının prezidenti Orxan Əliyevə təşəkkür edib.