Ərdoğan Türkiyə millisinin futbolçuları ilə görüşdü

Türkiyə millisinin AVRO-2024-ün 1/4 finalında Niderland seçməsinə məğlubiyyətindən sonra ölkə Prezidenti Rəcəp Tayyib Ərdoğan komandaya dəstək olub.

Oyunu stadiondan izləyən dövlət başçısı görüş başa çatdıqdan sonra komandanın paltardəyişmə otağına gedib. “Ay-ulduzlular” turnirlə vidalaşsa da, Prezident komanda üzvlərini yarışda layiqli çıxış etdikləri üçün təbrik edib.

Qeyd edək ki, Portuqaliya, Çexiya və Gürcüstanla eyni qrupda mübarizə aparan Türkiyə millisi qrup ikincisi kimi 1/8 finala yüksəlib. Bu mərhələdə Avstriyanı 2:1 hesabı ilə məğlub edərək mübarizədən kənarlaşdıran Türkiyə seçməsi 1/4 finalda Niderlanda 1-2 hesabı ilə məğlub olub.