“Formula Drift Azerbaijan” yarışının ilk mərhələsi baş tutub

Sentyabrın 7-dən 8-dək Bakıda ilk dəfə olaraq Azərbaycan Avtomobil Federasiyasının təşkilatçılığı və Nərgiz Fondunun təşkilati dəstəyi ilə “Formula Drift Azerbaijan” yarışı keçirilib.

Turnirdə ölkəmizin 12 təcrübəli pilotu iştirak edib.

Rəsmi drift hakimi sertifikatlı İrakli Şalikaşvili, Nodari Kodua və Giga Kalandianın münsiflik etdiyi yarışda yarımfinal mərhələsi xüsusilə maraqlı alınıb. Pilotlar arasında başa-baş mübarizə getdiyindən bu etapı 3 dəfə təkrarlamaq lazım gəlib.

Yekunda finala məşhur drift ustalarımız Elvin Xudaverdiyev və Niyaz Bediyev vəsiqə qazanıblar. Onların mübarizəsində qələbəni Niyaz Bediyev bayram edib. İlk üçlüyü Rəhman Şıxəliyev qapayıb.

Reqlamentə əsasən, il ərzində ümumilikdə 4 dəfə keçiriləcək turnirin yekununda drift üzrə Azərbaycan çempionu müəyyənləşəcək.