Futbol üzrə Almaniya çempionatında qalib məlumdur

2024-cü ilin 14 aprel tarixi “Bayer Leverkuzen” üçün əlamətdar oldu.

Məhz həmin gün 2022-ci ilin oktyabrından kollektivi çalışdıran Xabi Alonsonun rəhbərliyi ilə “Bayer” tarixində ilk dəfə Almaniya çempionu adına yiyələndi. Komanda bu uğura sona 5 tur qalmış doğma meydanda “Verder”ə 5-0 hesabı ilə qalib gəlməklə nail oldu. Vaxtından əvvəl Bundesliqanı qazanan “Bayer” həm də bütün yarışlarda məğlubiyyətsizlik seriyasını 43 matça çatdırdı.

Eyni zamanda leverkuzenlilər daxili çempionatda “Bavariya”nın hegemonluğuna da son qoydular. Ardıcıl 11 il qızıl medallara yiyələnən “rekordmayster” bu mövsüm “Bayer”lə mübarizədə uğursuzluğa düçar oldu.

Qeyd edək ki, baş məşqçi Xabi Alonsonun futbolçuları digər turnirlərdə də qələbə uğrunda yarışırlar. Ölkə kubokunun finalında “Kayzerslautern”lə görüşü gözləyən “Bayer” Avropa liqasında da yoluna davam edir. 1/4 finalın ilk matçında “Vest Hem”i 2-0 hesabı ilə məğlub edən komanda bu turnirdə də qalibiyyətə əsas namizədlərdəndir.