Gənc cüdoçumuz Nihad Məmişov dünya çempionatında 1-ci olub

Gənc cüdoçularımız Peruda keçirilən yeniyetmələr arasında dünya çempionatının ilk günündə 2 medal qazanıblar.

Təmsilçilərimizdən 55 kq çəkidə çıxış edən Nihad Məmişov Lima şəhərində təşkil olunan yarışda fəxri kürsünün ən yüksək pilləsinə qalxıb.

Mübarizəyə 1/16 finaldan başlayan Nihad ardıcıl olaraq Kanada, Polşa, Macarıstan və Ukrayna nümayəndələrinə qalib gələrək finala adlayıb. Həlledici görüşdə isə monqolustanlı Bat-Enerel Batbileqi məğlub edən cüdoçumuz karyerasında 2-ci dəfə bu yarışın qızıl medalına yiyələnib.

Digər idmançımız 50 kq-dək çəkidə yarışan Məhəmmədəli Hüsiyev isə ölkəmizə bürünc mükafatı qazandırıb. Turnir ərzində İtaliya və Fransa təmsilçilərinə qalib gələn Məhəmmədəli yarımfinalda uduzsa da, üçüncülük uğrunda mübarizədən qələbə ilə ayrılıb.

Qeyd edək ki, sentyabrın 1-dək davam edəcək dünya birinciliyində 48 ölkədən 223-ü oğlan və 180-i qız olmaqla ümumən 403 cüdoçu yarışır.