Gənc futbolçuya görə “Barselona”ya astronomik məbləğ təklif olunub

“Barselona” komandanın ən istedadlı futbolçularından 17 yaşlı Lamin Yamal üçün gələn 250 milyon avroluq təklifdən imtina edib.

Bununla bağlı məşhur jurnalist Fabritsio Romano paylaşım edib.

Belə ki, “blauqrana”nın prezidenti Joan Laporta bir müddət əvvəl “Biz Yamal üçün gələn 250 milyon avroluq təklifi geri çevirdik” ifadəsini işlədib. Məsələni araşdıran Romano isə həmin təklifin “Pari Sen-Jermen”dən gəldiyini aydınlaşdırıb.

Qeyd edək ki, dünyanın ən bahalı futbolçularından olan Laminin məşhur “transfermarkt” portalına görə dəyəri 150 milyon avrodur. “Barselona”nın yetirməsi olan və ötən ildən əsas komandaya cəlb edilən Yamal 62 matçda 12 qol və 14 assist müəllifi olmaqla yanaşı, La Liqanın qalibi olub. İspaniya millisinin də vacib futbolçularından olan Lamin bu ilin yayında “Qırmızı Furiya”nın Avropa çempionu olmasında önəmli rol oynayıb.