Güləşçilər arasında qızğın mübarizə | AGF-nin mətbuat katibi nələri açıqladı? - Baku TV

Bakıda keçirilən güləş üzrə U-17 dünya çempionatının üçüncü günü davam edir.

Bu gün Azərbaycanın yunan-Roma güləşi üzrə üç təmsilçisi həlledici görüşlərə çıxacaq.

Azərbaycan Güləş Federasiyasının mətbuat katibi Sərxan Musa bildirib ki, Avropa çempionu Əli Cavadlı finalda ABŞ təmsilçisi ilə qarşılaşacaq:

"Ümid edirik ki, Əli Cavadlı Avropa çempionluğunun ardınca dünya çempionu da olacaq".

Onun sözlərinə görə, ötən il dünya çempionatının mükafatçısı olan Abdurrahman Hüseynli bu dəfə qızıl medal uğrunda Özbəkistan təmsilçisi ilə mübarizə aparacaq:

"Ötən il medal qazanan Abdurrahman Hüseynlinin bu il əsas hədəfi qızıl medaldır və onun bunun üçün kifayət qədər yüksək potensialı var".

Yarımfinalda məğlub olan Elmir Çərkəzov isə bürünc medal uğrunda Yaponiya güləşçisi ilə qarşılaşacaq.

S.Musa qeyd edib ki, Azərbaycan yığması artıq bir gümüş və iki bürünc medal qazanıb, günün sonunda isə ümumi medal sayını altıya çatdırmaq şansı var:

"Hazırda komanda hesabında ikinci yerdəyik. Məqsədimiz yarışın yekununda ilk üçlükdə qərarlaşaraq kuboka sahib olmaqdır".