Güləşçilərimizin dünya çempionatına hazırlığı sona yaxınlaşır

Güləş millilərimiz Serbiyada keçiriləcək dünya çempionatı üçün hazırlığı yekunlaşdırmaq üzrədir.

Turnirdə ölkəmizi həm sərbəst, həm də yunan-Roma güləşində 10 idmançı təmsil edəcək. Qadınlardan ibarət komandamızda isə 6 güləşçi yer alacaq.

Belqrad şəhərində baş tutacaq yarışda Hacı Əliyev, Əliabbas Rzazadə, Osman Nurmaqomedov və Turan Bayramov kimi tanınmış pəhləvanlarımız mübarizə aparacaq.

Yunan-Roma güləşçilərimizdən isə Eldəniz Əzizli, Rafiq Hüseynov, Həsrət Cəfərov, Ülvü Qənizadə və İslam Abbasov kimi məşhur idmançılarımız medal qazanmağa çalışacaqlar.

Qadın güləşçilərin turnirində isə Mariya Stadnik, Elnurə Məmmədova, Elis Manolova, Alyona Kolesnik, Jalə Əliyeva və Birgül Soltanova qüvvəsini sınayacaq.

Qeyd edək ki, sentyabrın 16-da start götürəcək güləş üzrə dünya çempionatı sentyabrın 24-dək davam edəcək.