Həbib Nurməhəmmədov Patris Evranı Luis Suareslə döyüşə hazırlayacaq

UFC-nin sabiq çempionu Həbib Nurməhəmmədov yaxın keçmişin futbol ulduzu Luis Suareslə döyüşmək istəyən Patris Evranı MMA üzrə PFL turnirindəki debüt yarışına hazırlayacaq.

Qeyd olunur ki, rusiyalı idmançı mayın 23-də Parisdə keçiriləcəyi planlaşdırılan döyüşlə bağlı “Mançester Yunayted” klubunun sabiq kapitanı ilə telefon danışığı həyata keçirib.

H.Nurməhəmmədova böyük hörmət bəslədiyini bildirən P.Evra onunla məşq etmək istədiyini deyib. H.Nurməhəmmədov isə P.Evraya rəqiblərini necə məhv etmək lazım olduğunu öyrədəcəyini bildirib.

Əlavə edək ki, Patris Evranın nümayəndələri hazırda “İnter Mayami”nin formasını geyinən Luis Suaresə döyüşmək təklifi göndərib. Uruqvaylı futbolçunun yaxınları təklifi yüksək dəyərləndirsə də, hələ konkret cavab verməyib.

Qeyd edək ki, İngiltərə Premyer Liqasında çıxış etdikləri dövrdə sözügedən futbolçular arasında irqçilik zəminində konflikt olub.