Hərbçilər arasında güləş üzrə 36-cı dünya çempionatı ölkəmizdə keçiriləcək

Noyabr ayının sonlarında paytaxtımız 19 ölkədən 400-dək nümayəndənin iştirakı ilə hərbçilər arasında güləş üzrə 36-cı dünya çempionatına ev sahibliyi edəcək.

Bununla əlaqədar təşkil olunan mətbuat konfransında Dövlət Sərhəd Xidmətinin “Sərhədçi” İdman Mərkəzinin rəisi Elşən Mirzəyev, Dünya Hərbi İdman Şurasının idman direktoru Jan Van Den Dool və məşhur güləşçilərimiz iştirak ediblər.

Tədbirdə Prezident İlham Əliyevin diqqət və qayğısı nəticəsində Azərbaycanın dünyada idman dövləti kimi tanındığı, beynəlxalq yarışlara ev sahibliyi etmək sahəsində böyük təcrübəyə malik olduğu bildirilib.

Qeyd olunub ki, hərbçilər arasında güləş üzrə dünya çempionatının ölkəmizdə keçirilməsinə tərəddüdsüz razılığın verilməsi, ölkəmizin beynəlxalq idman yarışlarını yüksək səviyyədə təşkil etməsindən qaynaqlanır.

Qeyd edək ki, “İdmanla Dostluq” devizi altında keçiriləcək yarış noyabrın 27-dən dekabrın 3-dək davam edəcək.