İngiltərə çempionatında 31-ci tura start verilib

İngiltərə Premyer liqasında 31-ci tura start verilib.

Maraqlı oyunlardan biri “Vest Hem” və “Tottenhem” arasında London derbisi olub. Hesabı artıq 5-ci dəqiqədə “mahmızlar” açıblar. Brennan Conson qonaqları irəli çıxarıb. Ancaq “Vest Hem”in cavabı özünü çox gözlətməyib. Kurt Zuma “çəkicdöyənlər”in bərabərlik topunu vurub. Qalan vaxtda tərəflərin səylərinə baxmayaraq, başqa qol olmayıb. “Vest Hem” – “Tottenhem”: 1-1.

Avrokuboklar zonasından kənarda qalan “Nyukasl” 31-ci turda “Everton”u qəbul edib. Premyer liqada 12 oyundur qələbəyə həsrət olan mersisaydlılar bu dəfə də uğur qazana bilməyiblər. “Sent-Ceyms Park” arenasındakı matçda Aleksandr İsakın qoluna qonaqlar görüşün sonlarında Kalvert Lyuinin dəqiq zərbəsi ilə cavab veriblər. “Nyukasl” – “Everton”: 1-1.

Ən bol qollu qarşılaşma “Nottingem Forest” və “Fulhem” arasında olub. 4 topun qeydə alındığı oyunda “Forest”dən Hadson-Odoi, Vud və Gibs-Uayt fərqləniblər. “Fulhem”in yeganə qolu isə Tosin Adarabioyonun aktivindədir. Matç Nottingem klubunun 3-1 hesablı qələbəsi ilə bitib.

Qeyd edək ki, Premyer liqada 31-ci tura aprelin 4-ü yekun vurulacaq.