İngiltərə Liqa kubokunda 1/8 finalın iştirakçıları müəyyənləşib

İngiltərə Liqa kubokunda 1/16 final mərhələsinin mərkəzi matçı “Nyukasl” və “Mançester Siti” arasında olub.

“Sent-Ceyms Park” arenasındakı görüşdə “şəhərlilər” ilk hissədə üstün təsir bağışlasalar da, fərqlənə bilməyiblər. 2-ci yarının əvvəlində isə Aleksandr İsak “sağsağanlar”ı irəli çıxarıb. 1-0.

Bundan sonra “Siti” ardıcıl hücumlar təşkil etsə də, məğlubiyyətdən qaça bilməyib. Minimal hesablı qələbə qazanan “Nyukasl” 1/8 finalda “Mançester Yunayted”ə rəqib olub.

Daha bir maraqlı oyunda “Çelsi” və “Brayton” klubları üz-üzə gəliblər. Bu görüşün taleyini də bir top həll edib. Nikolas Ceksonun dəqiq zərbəsi ilə qalib gələn “zadəganlar” növbəti mərhələdə Çempionşip təmsilçisi “Blekbörn Rovers”lə qarşılaşacaq.

“Liverpul” da Liqa kubokunda yoluna davam edir. “Enfild”də “Lester Siti”ni qəbul edən “qırmızılar” ilk yarını 0-1 hesabı ilə geridə tamamlasalar da, fasilədən sonra vəziyyəti dəyişiblər.

Qakpo, Soboslai və Jotanın qolları ilə 3-1 hesablı qələbə qazanan mersisaydlılar 1/8 finalda “Bornmut”la qarşılaşacaqlar.