İngiltərə və İspaniyada kubok görüşləri keçirilib

İngiltərə Liqa kubokunda 1/32 final mərhələsinin maraqla gözlənilən matçlarından biri “Arsenal” və “Liverpul” arasında olub.

Londondakı “Emireyts Stedium”da baş tutan görüşdə qələbəni “qırmızılar” bayram ediblər. 80-ci dəqiqədə Yakub Kivörün avtoqolundan sonra irəli çıxan mersisaydlılar əsas vaxta artırılan dəqiqələrdə 2-ci qolu vurublar. Luis Diazın dəqiq zərbəsi “Liverpul”a qarşılaşmada 2-0 hesablı qalibiyyəti gətirib.

Son vaxtlar qeyri-sabit oyunla diqqət çəkən “Barselona” ölkə kubokunda da çətinliklə mərhələ adlayıb. 1/16 finalda 3-cü liqa təmsilçisi “Barbastro”nun qonağı olan “blauqrana” Fermin Lopez, Rafinya və Levandovskinin qolları ilə 90 dəqiqəni 3-1 hesabı ilə öndə tamamlasa da, artırılan dəqiqələrdə meydan sahibləri fərqi azaldıblar. Ancaq “Barbastro”nun bundan artığına gücü çatmayıb və “Barsa” 3-2 hesablı qələbə ilə mərhələ adlayıb.

A Seriyasında isə 19-cu tur son çempion “Napoli”nin böyükhesablı məğlubiyyəti ilə ilə əlamətdar olub. Səfərdə “Torino” ilə qarşılaşan neapollular 0-3 hesabı ilə uduzublar. Qələbəsiz seriyası 4 oyuna çatan və 28 xalı olan “Napoli” hazırda lider “İnter”dən 20 xal geri qalır və 9-cu pillədədir.