İngiltərənin nəhəng klubları Viktor Osimhenin izində

“Qalatasaray”ın ulduzu Viktor Osimhen uğrunda mübarizə qızışmağa davam edir.

“Mançester Yunayted”in hədəfində olan nigeriyalı hücumçu İngiltərənin daha bir nəhəngi “Arsenal”ın da maraq dairəsindədir.

Kay Haverts və Qabriel Jezuşun zədələnməsindən sonra irəli xətdə ciddi problemlərlə üzləşən “topçular” növbəti mövsümdən bu zonada rotasiyanı gücləndirmək istəyir.

Bu vəziyyətdə gələcəyi ilə bağlı son qərarı məhz Osimhen verəcək. Müqavilə ilə “Napoli”yə məxsus olan futbolçunun sözləşməsində 75 milyon avro qarşılığında azad qalmaq bəndi var. Bu məbləği ödəmək həm mankunianlar, həm də londonlular üçün problem kəsb etmir. Belə olan halda Viktorun qərarına komandaların mövsümün sonunda tutacağı mövqelər təsir edə bilər.

Xatırladaq ki, Osimhen ötən ilin sentyabrından “Qalatasaray”ın formasını geyinir. İcarədə olan 26 yaşlı forvard 28 matçda 22 dəfə rəqib qapılarına yol tapıb.