İspaniya Superkubokunda ilk finalçı müəyyənləşdi

İspaniya superkubokunda yarımfinal mərhələsinin ilk görüşü keçirilib.

Səudiyyə Ərəbistanının paytaxtı Ər-Riyad şəhərində baş tutan matçda “Real Madrid” və “Valensiya” klubları üz-üzə gəliblər. Gərginliyi ilə diqqət çəkən oyunun əsas vaxtında 2 qol qeydə alınıb. 39-cu dəqiqədə Kərim Benzema penaltini dəqiq yerinə yetirərək komandasını irəli çıxarsa da, 46-cı dəqiqədə Samuel Lino tarazlığı bərpa edib:1-1.

90 dəqiqə ərzində başqa qol olmadığı üçün əlavə vaxta ehtiyac yaranıb. Burada da tərəflər fərqlənə bilmədiyindən penaltilər seriyasına müraciət olunub. 11 metrlik zərbələrdə isə “Real” futbolçuları daha dəqiq olublar. 4-3 hesabı ilə güclü olan “kral klubu” superkubokun finalına adlayıb.

İngiltərədə isə Liqa kubokunun 1/4 final görüşləri keçirilib. Gözlənilməz nəticə "Sauthempton" - "Mançester Siti" matçında qeydə alınıb. Qarşılaşmanın favoriti “şəhərlilər” olsa da, oyun “müqəddəslər”in qalibiyyəti ilə yekunlaşıb. Meydan sahiblərinin 2-0 hesablı qələbə qazandığı görüşdə “Sauthempton”un qolları Seku Mara və Mussa Ceneponun aktivindədir. Bu nəticədən sonra yarımfinala adlayan “Sauthempton” burada “Nyukasl”a rəqib olub.