ISSF rəsmisi atıcılıq üzrə dünya çempionatının təşkilini yüksək qiymətləndirib

Bakıda keçirilən atıcılıq üzrə 53-cü dünya çempionatı başa çatıb.

Beynəlxalq Atıcılıq Federasiyasının baş katibi Villi Qrill bağlanış mərasimindən sonra yarışın yekunları ilə bağlı təəssüratlarını bölüşüb:

“Bakıdakı yarışda 14 rekord qeydə alındı. Əvvəlki dünya çempionatlarında belə nəticə olmamışdı. Eyni zamanda gələn il Parisdə keçiriləcək Yay Olimpiya Oyunlarına 48 lisenziyanın verilməsi də nailiyyətdir. Açılış mərasimindən bağlanış mərasiminə kimi hər şey yüksək səviyyədə təşkil olundu. Bu, bütöv komandanın işidir. Azərbaycan Atıcılıq Federasiyasının baş katibi Emin Cəfərovun fəaliyyətini xüsusilə vurğulamaq istəyirəm. Onun komandası mükəmməl iş gördü. Könüllülərə də təşəkkür etmək istəyirəm. 30 illik fəaliyyətimdə gördüyüm ən fəal könüllülər idi. Azərbaycan dünya çempionatını elə səviyyəyə çatdırdı ki, inanmıram hansısa ölkə yenidən belə bir iş ortaya qoysun. 9 olimpiadada, çox sayda turnirdə iştirak etmişəm. Deyə bilərəm ki, heç bir yarış Azərbaycandakı kimi təşkil olunmayıb. Bir daha hər kəsə təşəkkür edirəm”.