İstanbul nəhəngi İngiltərə Premyer Liqasından ulduz futbolçu hədəfləyib

“Fənərbaxça” yeni mövsümdə çox müzakirə olunacaq transfer edə bilər.

İstanbul nəhəngi elə bir adı gündəmə gətirib ki, klubun azarkeşləri artıq həyəcan içindədir.

Belə ki, İstanbul nəhəngi İngiltərə Premyer Liqasından Kristofer Nkunkunu heyətinə qatmağı planlaşdırır.

Fransalı yarımmüdafiəçinin "Çelsi"də oynamaq şansı olmadığı üçün futbolçu həmin komandadan ayrılmaq fikrinə isti yanaşır. London təmsilçisinin çalışdırıcısı Entso Mareskanın da bu ayrılığa “yaşıl işıq” yandırdığı bildirilib.

Türkiyə mətbuatında manşetləri bəzəyən xəbərə görə, “Fənərbaxça” hücum xəttinin istənilən zonasında oynaya bilən fransız futbolçuya “elçi düşüb”. Komandanın mövsümün sonunda Nkunkunun nümayəndələrinə, eləcə də London klubuna rəsmi təklif edəcəyi gözlənilir.

Mümkün transferin klubun baş məşqçisi Joze Mourinyonu tam olaraq qane etdiyi xüsusi diqqətə çatdırılır. 27 yaşlı futbolçunun transfer dəyəri 80 milyon avro olaraq göstərilir.

Bu mövsüm "Çelsi"nin heyətində 42 oyun keçirən Nkunku 14 qol və 5 məhsuldar ötürmə ilə diqqət çəkib.