Karateçilərimiz BƏƏ-dən 6 medalla qayıdıb

Birləşmiş Ərəb Əmirliklərində keçirilən karate üzrə beynəlxalq turnirdə yığmamız uğurla çıxış edib.

Fucayra şəhərində təşkil olunan yarışa 27 idmançı ilə qatılan komandamız 6 medal qazanıb. Təmsilçilərimizdən 14 yaşadək karateçilər arasında yer alan Əfqan Tarverdi qızıl, Zeynəb Nəbiyeva gümüş, Raul Səfərəliyev isə bürünc medalın sahibi olub.

Bundan başqa, 17 yaşadək idmançıların mübarizəsində nümayəndələrimizdən Amin Yadigarlı qızıl, Rumil Cəfərli isə gümüş mükafata yiyələnib.

Daha bir medal 21 yaşadək turnirdə çıxış edən Nicat Kərimlinin aktivindədir. Nicat fəxri kürsünün 2-ci pilləsinə qalxıb.